talash-e-yar mein jaan se guzar ke dekhte hain

talāsh-e-yār meñ jaañ se guzar ke dekhte haiñ

jo ḳhaak haiñ to zamīñ par bikhar ke dekhte haiñ

vo kis ne dekhī hai gahrā.ī shām-e-furqat kī

ufuq ke paar zamīñ par utar ke dekhte haiñ

sunā hai us kī nigāheñ shikār kartī haiñ

karishme ham bhī chalo fitna-gar ke dekhte haiñ

agar gulāb hī un ko pasand aate haiñ

to kyoñ na aaj se ham bhī sañvar ke dekhte haiñ

ye kaun shaḳhs hai jaane kidhar se aaya hai

dīvāne saare hameñ shahr-bhar ke dekhte haiñ

ḳhudā unheñ to bure din kabhī na dikhlā.e

vo hausle jo hamāre jigar ke dekhte haiñ

hamārī āñkhoñ meñ chashme se phuuT paḌte haiñ

kabhī kabhī vo hameñ aañkh bhar ke dekhte haiñ

kaleja thaam ke rakhnā ai dost mahfil meñ

vo kyā se kyā na sitam ham pe kar ke dekhte haiñ

hamāre sar pe qayāmat sī TuuT paḌtī hai

kabhī zamīñ se zarā sā ubhar ke dekhte haiñ

talāsh-e-yār meñ rahtī hai merī tanhā.ī

dayār-e-ġhair meñ kyā kyā na kar ke dekhte haiñ

mirā hī aks hai mujh se ḳhafā ḳhafā 'barham'

to kyoñ na us ke hī hāthoñ se mar ke dekhte haiñ

talash-e-yar mein jaan se guzar ke dekhte hain

jo KHak hain to zamin par bikhar ke dekhte hain

wo kis ne dekhi hai gahrai sham-e-furqat ki

ufuq ke par zamin par utar ke dekhte hain

suna hai us ki nigahen shikar karti hain

karishme hum bhi chalo fitna-gar ke dekhte hain

agar gulab hi un ko pasand aate hain

to kyon na aaj se hum bhi sanwar ke dekhte hain

ye kaun shaKHs hai jaane kidhar se aaya hai

diwane sare hamein shahr-bhar ke dekhte hain

KHuda unhen to bure din kabhi na dikhlae

wo hausle jo hamare jigar ke dekhte hain

hamari aankhon mein chashme se phuT paDte hain

kabhi kabhi wo hamein aankh bhar ke dekhte hain

kaleja tham ke rakhna ai dost mahfil mein

wo kya se kya na sitam hum pe kar ke dekhte hain

hamare sar pe qayamat si TuT paDti hai

kabhi zamin se zara sa ubhar ke dekhte hain

talash-e-yar mein rahti hai meri tanhai

dayar-e-ghair mein kya kya na kar ke dekhte hain

mera hi aks hai mujh se KHafa KHafa 'barham'

to kyon na us ke hi hathon se mar ke dekhte hain