talatum-KHez maujon ko bhi jada kar liya maine

talātum-ḳhez maujoñ ko bhī jaada kar liyā maiñ ne

kināre par pahuñchne kā irāda kar liyā maiñ ne

tire baḳhshe hue ġham sah liye aañsū chhupā laayā

kabhī dil aur kabhī dāman kushāda kar liyā maiñ ne

tamāsha dekh lenā ḳhūn-e-dil āñkhoñ se chhalkegā

agar zabt-e-alam had se ziyāda kar liyā maiñ ne

bahut rangīn thā dil kā varaq ġham ke tasavvur se

magar ashkoñ se dho kar is ko saada kar liyā maiñ ne

sikhātā kaun jiine kī adā.eñ zindagānī ko

ḳhud apnī ḳhāmiyoñ se istifāda kar liyā maiñ ne

mirī tanhā-pasandī ko rifāqat kab gavāra thī

bichhaḌne kā irāda be-irāda kar liyā maiñ ne

'aqīl' ab muntazir baiThā huuñ tūfān-e-havādis kā

ki ḳhvāboñ kā mahal phir īstāda kar liyā maiñ ne

talatum-KHez maujon ko bhi jada kar liya main ne

kinare par pahunchne ka irada kar liya main ne

tere baKHshe hue gham sah liye aansu chhupa laya

kabhi dil aur kabhi daman kushada kar liya main ne

tamasha dekh lena KHun-e-dil aankhon se chhalkega

agar zabt-e-alam had se ziyaada kar liya main ne

bahut rangin tha dil ka waraq gham ke tasawwur se

magar ashkon se dho kar is ko sada kar liya main ne

sikhata kaun jine ki adaen zindagani ko

KHud apni KHamiyon se istifada kar liya main ne

meri tanha-pasandi ko rifaqat kab gawara thi

bichhaDne ka irada be-irada kar liya main ne

'aqil' ab muntazir baiTha hun tufan-e-hawadis ka

ki KHwabon ka mahal phir istada kar liya main ne