talKH shirin misron ke zaiqe badalte hain

talḳh shīrīñ misroñ ke zā.iqe badalte haiñ

jaise jaise ġhazloñ meñ qāfiye badalte haiñ

kal talak to vo ham se baat ko taraste the

dekh kar jo ab ham ko rāste badalte haiñ

dukh za.iif maañ kā ho yā javān beva kā

dukh to dukh hī hote haiñ marsiye badalte haiñ

aasrā nahīñ miltā jab koī hasīnoñ ko

mehrbān āñkhoñ ke zāviye badalte haiñ

baar baar vo dil ko bevafā batātā hai

baar baar dil ke ham tajziye badalte haiñ

vaise hī vo rahte haiñ jaisī un kī fitrat hai

kab bhalā vo apnoñ ke vāste badalte haiñ

talKH shirin misron ke zaiqe badalte hain

jaise jaise ghazlon mein qafiye badalte hain

kal talak to wo hum se baat ko taraste the

dekh kar jo ab hum ko raste badalte hain

dukh zaif man ka ho ya jawan bewa ka

dukh to dukh hi hote hain marsiye badalte hain

aasra nahin milta jab koi hasinon ko

mehrban aankhon ke zawiye badalte hain

bar bar wo dil ko bewafa batata hai

bar bar dil ke hum tajziye badalte hain

waise hi wo rahte hain jaisi un ki fitrat hai

kab bhala wo apnon ke waste badalte hain