تلخ شیریں مصرعوں کے ذائقے بدلتے ہیں

تلخ شیریں مصرعوں کے ذائقے بدلتے ہیں

جیسے جیسے غزلوں میں قافیے بدلتے ہیں

کل تلک تو وہ ہم سے بات کو ترستے تھے

دیکھ کر جو اب ہم کو راستے بدلتے ہیں

دکھ ضعیف ماں کا ہو یا جوان بیوہ کا

دکھ تو دکھ ہی ہوتے ہیں مرثیے بدلتے ہیں

آسرا نہیں ملتا جب کوئی حسینوں کو

مہربان آنکھوں کے زاویے بدلتے ہیں

بار بار وہ دل کو بے وفا بتاتا ہے

بار بار دل کے ہم تجزیے بدلتے ہیں

ویسے ہی وہ رہتے ہیں جیسی ان کی فطرت ہے

کب بھلا وہ اپنوں کے واسطے بدلتے ہیں