tamam dard ho dil aur nazar gila na kare

tamām dard ho dil aur nazar gila na kare

kisī ġharīb pe yuuñ aa bane ḳhudā na kare

hazār dard de aur ek kī davā na kare

jo kuchh kisī kī nigāh-e-karishma-zā na kare

vo dil kī ik na sune dil mirā kahā na kare

paḌe kisī se kisī kī ġharaz ḳhudā na kare

bigaḌ ke baiThe haiñ tyorī chaḌhī hai barham haiñ

ki koī arz-e-tamannā kā hausla na kare

na ban-sañvar ke har ik baar aa.ina dekho

lage tumhīñ ko tumhārī nazar ḳhudā na kare

shab-e-firāq ke taare ye kah ke Duub ga.e

kisī kā koī mohabbat meñ aasrā na kare

junūn-e-ishq kī ma.asūm hasrateñ tauba

vo minnateñ kareñ dil arz-e-mudda.ā na kare

dil aur terī mohabbat ke dukh are tauba

ye ġham nasīb ho dushman ko bhī ḳhudā na kare

nigāh-e-nāz ho jab aap silsila-jumbāñ

to kaun hogā jo tajdīd-e-mudda.ā na kare

tumhīñ kaho ki jo tum aas is tarah toḌo

to kis umiid pe dil tark-e-mudda.ā na kare

kisī ke va.ada-e-fardā kī sharm rah jaa.e

ḳhudā kare ki mirī zindagī vafā na kare

dil aur pahlī mohabbat kī choT are tauba

ġham aur taaza judā.ī kā ġham ḳhudā na kare

'sarosh' kitnā hasīñ hai ye maslak-e-‘hāfiz’

gunāh laakh kare ek dil burā na kare

tamam dard ho dil aur nazar gila na kare

kisi gharib pe yun aa bane KHuda na kare

hazar dard de aur ek ki dawa na kare

jo kuchh kisi ki nigah-e-karishma-za na kare

wo dil ki ek na sune dil mera kaha na kare

paDe kisi se kisi ki gharaz KHuda na kare

bigaD ke baiThe hain tyori chaDhi hai barham hain

ki koi arz-e-tamanna ka hausla na kare

na ban-sanwar ke har ek bar aaina dekho

lage tumhin ko tumhaari nazar KHuda na kare

shab-e-firaq ke tare ye kah ke Dub gae

kisi ka koi mohabbat mein aasra na kare

junun-e-ishq ki masum hasraten tauba

wo minnaten karen dil arz-e-muddaa na kare

dil aur teri mohabbat ke dukh are tauba

ye gham nasib ho dushman ko bhi KHuda na kare

nigah-e-naz ho jab aap silsila-jumban

to kaun hoga jo tajdid-e-muddaa na kare

tumhin kaho ki jo tum aas is tarah toDo

to kis umid pe dil tark-e-muddaa na kare

kisi ke wada-e-farda ki sharm rah jae

KHuda kare ki meri zindagi wafa na kare

dil aur pahli mohabbat ki choT are tauba

gham aur taza judai ka gham KHuda na kare

'sarosh' kitna hasin hai ye maslak-e-‘hafiz’

gunah lakh kare ek dil bura na kare