تمام درد ہو دل اور نظر گلہ نہ کرے

تمام درد ہو دل اور نظر گلہ نہ کرے

کسی غریب پہ یوں آ بنے خدا نہ کرے

ہزار درد دے اور ایک کی دوا نہ کرے

جو کچھ کسی کی نگاہ کرشمہ زا نہ کرے

وہ دل کی اک نہ سنے دل مرا کہا نہ کرے

پڑے کسی سے کسی کی غرض خدا نہ کرے

بگڑ کے بیٹھے ہیں تیوری چڑھی ہے برہم ہیں

کہ کوئی عرض تمنا کا حوصلہ نہ کرے

نہ بن سنور کے ہر اک بار آئنہ دیکھو

لگے تمہیں کو تمہاری نظر خدا نہ کرے

شب فراق کے تارے یہ کہہ کے ڈوب گئے

کسی کا کوئی محبت میں آسرا نہ کرے

جنون عشق کی معصوم حسرتیں توبہ

وہ منتیں کریں دل عرض مدعا نہ کرے

دل اور تیری محبت کے دکھ ارے توبہ

یہ غم نصیب ہو دشمن کو بھی خدا نہ کرے

نگاہ ناز ہو جب آپ سلسلہ جنباں

تو کون ہوگا جو تجدید مدعا نہ کرے

تمہیں کہو کہ جو تم آس اس طرح توڑو

تو کس امید پہ دل ترک مدعا نہ کرے

کسی کے وعدۂ فردا کی شرم رہ جائے

خدا کرے کہ مری زندگی وفا نہ کرے

دل اور پہلی محبت کی چوٹ ارے توبہ

غم اور تازہ جدائی کا غم خدا نہ کرے

سروشؔ کتنا حسیں ہے یہ مسلک حافظؔ

گناہ لاکھ کرے ایک دل برا نہ کرے