tamam din ki thakan ko miTa raha hai koi

tamām din kī thakan ko miTā rahā hai koī

lo shaam ho ga.ī mujh ko bulā rahā hai koī

vo zaḳhm khā ke karātā nahīñ kabhī ehsās

ta'alluqāt ko yuuñ bhī nibhā rahā hai koī

abhī lahū kī zarūrat hai in charāġhoñ ko

ye farz-e-‘ain abhī tak nibhā rahā hai koī

chalo ki sar pe safar hai pahāḌ kī sūrat

uTho ki vaqt-e-sahar hai jagā rahā hai koī

hamī se jang hamī se amān-e-jāñ kī talab

hamāre zarf ko phir aazmā rahā hai koī

charāġh-e-'azm kī lau ko baḌhā rakho 'hasrat'

ye fikr chhoḌo bujhāne pe aa rahā hai koī

tamam din ki thakan ko miTa raha hai koi

lo sham ho gai mujh ko bula raha hai koi

wo zaKHm kha ke karaata nahin kabhi ehsas

ta'alluqat ko yun bhi nibha raha hai koi

abhi lahu ki zarurat hai in charaghon ko

ye farz-e-‘ain abhi tak nibha raha hai koi

chalo ki sar pe safar hai pahaD ki surat

uTho ki waqt-e-sahar hai jaga raha hai koi

hami se jang hami se aman-e-jaan ki talab

hamare zarf ko phir aazma raha hai koi

charagh-e-'azm ki lau ko baDha rakho 'hasrat'

ye fikr chhoDo bujhane pe aa raha hai koi