تمام عزت و رفعت خدا کی شان میں ہے

تمام عزت و رفعت خدا کی شان میں ہے

وہی گواہی موذن کی ہر اذان میں ہے

پرانے زخم مرے ہو گئے ہیں پھر تازہ

عجیب درد کی لذت ترے بیان میں ہے

ستم گروں کے جگر کو جو پاش پاش کرے

اک ایسا تیر ابھی تک مری کمان میں ہے

عجیب بات ہے دشمن بھی قدر کرتے ہیں

یہ ایک جادوگری بھی تری زبان میں ہے

وہ جن کے نور سے پر نور کائنات ہوئی

انہیں کا نور زمیں اور آسمان میں ہے

مری دعا ہے خدا اس کو شاد کام رکھے

جو لطف شعر مری مادری زبان میں ہے

خدا نے بخشی ہے مقصودؔ جو تجھے خوبی

کہاں وہ خوبی کسی اور خوش بیان میں ہے