tamam nusKHe badal chuka jab tab apni fitrat badal raha hun

tamām nusḳhe badal chukā jab tab apnī fitrat badal rahā huuñ

mirī tabī'at ke haiñ muḳhālif maiñ aise sāñchoñ meñ Dhal rahā huuñ

'amal register ke likhne vaale ye do farishte mujhe batā.eñ

ye kaun sab kuchh chalā rahā hai maiñ kis kī marzī se chal rahā huuñ

kabhī to ban kar ke abr-e-bārāñ maiñ pyāse logoñ meñ jā barastā

magar maiñ apnī anā kā ḳhādim kueñ ke jaisā aTal rahā huuñ

vo ik nazariye se dekhtā thā so ab nazariya badal gayā hai

to us ko lagne lagā hai jaise maiñ rafta-rafta badal rahā huuñ

muḳhālifat kī ḳhalish ne merī hayāt jab lā-‘ilāj kar dī

jidhar ko duniyā kī Dhaal thī ab usī taraf maiñ phisal rahā huuñ

mirī haqīqat pe thiiñ musallat vo saarī parteñ udhaḌ rahī haiñ

mujhe ḳhabar bhī nahīñ thī yaaro maiñ ḳhud meñ jaisā nikal rahā huuñ

nayā chalan hai ki hukmarānoñ ko bad-gumānī ye ho ga.ī hai

ki ek adnā ġhulām huuñ maiñ aur un ke TukḌoñ pe pal rahā huuñ

tamam nusKHe badal chuka jab tab apni fitrat badal raha hun

meri tabi'at ke hain muKHalif main aise sanchon mein Dhal raha hun

'amal register ke likhne wale ye do farishte mujhe bataen

ye kaun sab kuchh chala raha hai main kis ki marzi se chal raha hun

kabhi to ban kar ke abr-e-baran main pyase logon mein ja barasta

magar main apni ana ka KHadim kuen ke jaisa aTal raha hun

wo ek nazariye se dekhta tha so ab nazariya badal gaya hai

to us ko lagne laga hai jaise main rafta-rafta badal raha hun

muKHalifat ki KHalish ne meri hayat jab la-‘ilaj kar di

jidhar ko duniya ki Dhaal thi ab usi taraf main phisal raha hun

meri haqiqat pe thin musallat wo sari parten udhaD rahi hain

mujhe KHabar bhi nahin thi yaro main KHud mein jaisa nikal raha hun

naya chalan hai ki hukmaranon ko bad-gumani ye ho gai hai

ki ek adna ghulam hun main aur un ke TukDon pe pal raha hun