tamam raat wo jaga kisi ke wade par

tamām raat vo jaagā kisī ke va.ade par

'vafā' ko aa hī ga.ī niiñd raat Dhalne par

jo sab kā dost thā har anjuman key raunaq thā

kal us key laash milī us ke ghar ke malbe par

har ek dost ke chehre ko ġhaur se dekhā

faqat ḳhulūs kā ġhāza thā sab ke chehre par

vo zauq-e-fan ho ki shāḳh-e-chaman ki ḳhāk-e-vatan

har ik kā haq hai mire ḳhuuñ ke qatre qatre par

chaman meñ yuuñ to the kuchh aur āshiyāñ lekin

girī jo barq to mere hī āshiyāne par

haqīqateñ nazar aa.iiñ to kis tarah un ko

ta.assubāt key ainak hai jin ke chehre par

karam mujhī pe thā sab bāġhbān-o-gulchīñ kā

kisī ne qaid kiyā aur kisī ne noche par

ye dasht-e-huzn hai karb-o-balā kā sahrā hai

chalegā kaun yahāñ ab 'vafā' ke raste par

tamam raat wo jaga kisi ke wade par

'wafa' ko aa hi gai nind raat Dhalne par

jo sab ka dost tha har anjuman key raunaq tha

kal us key lash mili us ke ghar ke malbe par

har ek dost ke chehre ko ghaur se dekha

faqat KHulus ka ghaza tha sab ke chehre par

wo zauq-e-fan ho ki shaKH-e-chaman ki KHak-e-watan

har ek ka haq hai mere KHun ke qatre qatre par

chaman mein yun to the kuchh aur aashiyan lekin

giri jo barq to mere hi aashiyane par

haqiqaten nazar aain to kis tarah un ko

tassubaat key ainak hai jin ke chehre par

karam mujhi pe tha sab baghban-o-gulchin ka

kisi ne qaid kiya aur kisi ne noche par

ye dasht-e-huzn hai karb-o-bala ka sahra hai

chalega kaun yahan ab 'wafa' ke raste par