tamanna KHud meri kuchh kam nahin hai

tamanna ḳhud mirī kuchh kam nahīñ hai

yahī 'ālam rahā to ġham nahīñ hai

vafāoñ se bhalā maiñ baaz aa.uuñ

mirā 'ālam tirā 'ālam nahīñ hai

sukūn-e-dil vahāñ miltā hai mujh ko

jahāñ koī sharīk-e-ġham nahīñ hai

haram kyā dair kyā kaisā kalīsā

junūñ kā sar kahīñ par ḳham nahīñ hai

hai sab kotāhī-e-chashm-e-tamanna

mohabbat is qadar mub.ham nahīñ hai

parastish-ḳhāna-e-ulfat hai duniyā

maqām-e-laġhzish-e-ādam nahīñ hai

mizāj-e-husn ko ilzām kyā duuñ

nizām-e-shauq mustahkam nahīñ hai

bharosa us kī rahmat par hai mujh ko

gunāh-e-zindagī kā ġham nahīñ hai

qafas un kā na gulshan un kā 'shādāñ'

vo jin ke bāzuoñ meñ dam nahīñ hai

tamanna KHud meri kuchh kam nahin hai

yahi 'alam raha to gham nahin hai

wafaon se bhala main baz aaun

mera 'alam tera 'alam nahin hai

sukun-e-dil wahan milta hai mujh ko

jahan koi sharik-e-gham nahin hai

haram kya dair kya kaisa kalisa

junun ka sar kahin par KHam nahin hai

hai sab kotahi-e-chashm-e-tamanna

mohabbat is qadar mubham nahin hai

parastish-KHana-e-ulfat hai duniya

maqam-e-laghzish-e-adam nahin hai

mizaj-e-husn ko ilzam kya dun

nizam-e-shauq mustahkam nahin hai

bharosa us ki rahmat par hai mujh ko

gunah-e-zindagi ka gham nahin hai

qafas un ka na gulshan un ka 'shadan'

wo jin ke bazuon mein dam nahin hai