تمنا خود مری کچھ کم نہیں ہے

تمنا خود مری کچھ کم نہیں ہے

یہی عالم رہا تو غم نہیں ہے

وفاؤں سے بھلا میں باز آؤں

مرا عالم ترا عالم نہیں ہے

سکون دل وہاں ملتا ہے مجھ کو

جہاں کوئی شریک غم نہیں ہے

حرم کیا دیر کیا کیسا کلیسا

جنوں کا سر کہیں پر خم نہیں ہے

ہے سب کوتاہیٔ چشم تمنا

محبت اس قدر مبہم نہیں ہے

پرستش خانۂ الفت ہے دنیا

مقام لغزش آدم نہیں ہے

مزاج حسن کو الزام کیا دوں

نظام شوق مستحکم نہیں ہے

بھروسہ اس کی رحمت پر ہے مجھ کو

گناہ زندگی کا غم نہیں ہے

قفس ان کا نہ گلشن ان کا شاداںؔ

وہ جن کے بازوؤں میں دم نہیں ہے