tapish kyon baDh rahi hai raston ki

tapish kyoñ baḌh rahī hai rāstoñ kī

qazā aane ko hai kyā ābloñ kī

hamāre haath hiirā ho ga.e haiñ

ghisā.ī karte karte pattharoñ kī

havā ke saath chalnā paḌ rahā hai

baḌī majbūriyāñ haiñ bādaloñ kī

jahāñ tak saath le jaa.eñ havā.eñ

vahīñ tak zindagī hai ḳhushbuoñ kī

yaqīnan phuul koī khil gayā hai

nahīñ to bhiiḌ kyoñ hai titliyoñ kī

usī ke sāmne ro.ūñgā jā kar

jo qīmat jāntā hai āñsuoñ kī

haTā kar 'chāñd' ne chehre se parda

zabāneñ kaaT diiñ tārīkiyoñ kī

tapish kyon baDh rahi hai raston ki

qaza aane ko hai kya aablon ki

hamare hath hira ho gae hain

ghisai karte karte pattharon ki

hawa ke sath chalna paD raha hai

baDi majburiyan hain baadalon ki

jahan tak sath le jaen hawaen

wahin tak zindagi hai KHushbuon ki

yaqinan phul koi khil gaya hai

nahin to bhiD kyon hai titliyon ki

usi ke samne rounga ja kar

jo qimat jaanta hai aansuon ki

haTa kar 'chand' ne chehre se parda

zabanen kaT din tarikiyon ki