tartib-o-tawazun ka na toDenge bharam hum

tartīb-o-tavāzun kā na toḌeñge bharam ham

ik roz saf-e-dahr se ho jā.eñge kam ham

jazboñ ke sulagte hue ḳhāshāk meñ gum tum

ḳhvāhish kī laraztī huī āvāz-e-aham ham

ai shāḳh-e-tamannā tujhe tanhā nahīñ karte

ḳhanjar tujhe paḌte haiñ pa hote haiñ qalam ham

us ne to yuuñ hī pūchh liyā thā ki koī hai

mahfil meñ uThā shor ba-yak-laḳht ki ham ham

sahrā ke tab-o-tāb kī baḳhshish hai ki tū hai

jhhaTkārte phirte haiñ in āñkhoñ se jo nam ham

ik ḳhvāb machaltā hai jo ban ban ke lahū tū

ik dard jo bharne nahīñ detā hameñ dam ham

mausam bhī kuchh aisā hai ki Dhalne nahīñ detā

kuchh tere taraf-dār bhī haiñ shām-e-alam ham

zanjīr-e-girāñ-bār hai shāḳh-e-rag-e-jāñ ab

mushkil se chaleñge bhī to do chaar qadam ham

siine meñ dabī rakhte haiñ bhūlī huī ik shakl

palkoñ pe uThā rakhte haiñ bār-e-shab-e-ġham ham

tartib-o-tawazun ka na toDenge bharam hum

ek roz saf-e-dahr se ho jaenge kam hum

jazbon ke sulagte hue KHashak mein gum tum

KHwahish ki larazti hui aawaz-e-aham hum

ai shaKH-e-tamanna tujhe tanha nahin karte

KHanjar tujhe paDte hain pa hote hain qalam hum

us ne to yun hi puchh liya tha ki koi hai

mahfil mein uTha shor ba-yak-laKHt ki hum hum

sahra ke tab-o-tab ki baKHshish hai ki tu hai

jhhaTkarte phirte hain in aankhon se jo nam hum

ek KHwab machalta hai jo ban ban ke lahu tu

ek dard jo bharne nahin deta hamein dam hum

mausam bhi kuchh aisa hai ki Dhalne nahin deta

kuchh tere taraf-dar bhi hain sham-e-alam hum

zanjir-e-giran-bar hai shaKH-e-rag-e-jaan ab

mushkil se chalenge bhi to do chaar qadam hum

sine mein dabi rakhte hain bhuli hui ek shakl

palkon pe uTha rakhte hain bar-e-shab-e-gham hum