tashrif shab ko lana kyon aar jaante hain

tashrīf shab ko laanā kyoñ aar jānte haiñ

shāyad ki aap ham ko bad-kār jānte haiñ

zulfoñ ke pech meñ ham go jānte nahīñ kuchh

par sar paTak ke apnā man maar jānte haiñ

vahshat meñ jo jo ham ne pathroñ se sar ko maarā

sahrā meñ jā ke pūchho kohsār jānte haiñ

afsos jin kī ḳhātir yuuñ ḳhalq meñ subuk haiñ

ḳhātir kā apnī ham ko vo yaar jānte haiñ

ye bhī nasīb-o-qismat gul khaa.e jin ke ġham meñ

mahfil kā apnī ham ko vo ḳhaar jānte haiñ

mutlaq nahīñ hai parvā sair-e-chaman kī 'ishrat'

ham dāġh-e-dil ko apne gulzār jānte haiñ

tashrif shab ko lana kyon aar jaante hain

shayad ki aap hum ko bad-kar jaante hain

zulfon ke pech mein hum go jaante nahin kuchh

par sar paTak ke apna man mar jaante hain

wahshat mein jo jo hum ne pathron se sar ko mara

sahra mein ja ke puchho kohsar jaante hain

afsos jin ki KHatir yun KHalq mein subuk hain

KHatir ka apni hum ko wo yar jaante hain

ye bhi nasib-o-qismat gul khae jin ke gham mein

mahfil ka apni hum ko wo KHar jaante hain

mutlaq nahin hai parwa sair-e-chaman ki 'ishrat'

hum dagh-e-dil ko apne gulzar jaante hain