taswir-e-iztirab sarapa bana hua

tasvīr-e-iztirāb sarāpā banā huā

phirtā huuñ shahr shahr unheñ DhūñDhtā huā

ik dard aur vo bhī kisī kā diyā huā

itnā baḌhā ki aap hī apnī davā huā

mil kar bichhaḌ gayā thā koī jis maqām par

ab tak usī maqām pe huuñ chup khaḌā huā

jaise use ḳhabar thī mire hāl-e-zār kī

guzrā vo is adā se mujhe dekhtā huā

jin hādsāt-e-dahr se bach kar chalā thā maiñ

har gaam par unhīñ kā mujhe sāmnā huā

yuuñ be-dilī ke saath sunā ham ne 'kāzmī'

jaise thā kuchh fasāna-e-hastī sunā huā

taswir-e-iztirab sarapa bana hua

phirta hun shahr shahr unhen DhunDhta hua

ek dard aur wo bhi kisi ka diya hua

itna baDha ki aap hi apni dawa hua

mil kar bichhaD gaya tha koi jis maqam par

ab tak usi maqam pe hun chup khaDa hua

jaise use KHabar thi mere haal-e-zar ki

guzra wo is ada se mujhe dekhta hua

jin hadsat-e-dahr se bach kar chala tha main

har gam par unhin ka mujhe samna hua

yun be-dili ke sath suna hum ne 'kazmi'

jaise tha kuchh fasana-e-hasti suna hua