tawaf-e-ka’ba-e-dil bar-bar karte hue

tavāf-e-kā’ba-e-dil bār-bār karte hue

thakā nahīñ maiñ kabhī zikr-e-yār karte hue

kis e'timād se paanī pe rakh rahā huuñ qadam

shikoh-e-'ijz se dariyā ġhubār karte hue

nikal gayā maiñ hudūd-e-bahisht se aage

tire ḳhayāl kā mausam bahār karte hue

lagī hai aañkh tire ḳhvāb ke ta'āqub meñ

thakā nahīñ huuñ tirā intizār karte hue

vo yuuñ huā ki mire haath lag gayā sūraj

siyāh shab meñ sitāra shikār karte hue

havā meñ aag ke paikar uḌā rahā huuñ maiñ

tilism-e-dīd se sho'la sharār karte hue

chhalak paḌe mirī āñkhoñ se kuchh gurezāñ ashk

use jahāz pe 'āsim' savār karte hue

tawaf-e-ka’ba-e-dil bar-bar karte hue

thaka nahin main kabhi zikr-e-yar karte hue

kis e'timad se pani pe rakh raha hun qadam

shikoh-e-'ijz se dariya ghubar karte hue

nikal gaya main hudud-e-bahisht se aage

tere KHayal ka mausam bahaar karte hue

lagi hai aankh tere KHwab ke ta'aqub mein

thaka nahin hun tera intizar karte hue

wo yun hua ki mere hath lag gaya suraj

siyah shab mein sitara shikar karte hue

hawa mein aag ke paikar uDa raha hun main

tilism-e-did se sho'la sharar karte hue

chhalak paDe meri aankhon se kuchh gurezan ashk

use jahaz pe 'asim' sawar karte hue