tegh rakhte hain na hum tir-o-tabar rakhte hain

teġh rakhte haiñ na ham tīr-o-tabar rakhte haiñ

haañ yazīdoñ se na jhuk paa.e vo sar rakhte haiñ

be-ḳhabar logoñ ko ehsās nahīñ hai is kā

jo ḳhabar vaale haiñ har shai kī ḳhabar rakhte haiñ

phūTī kauḌī ke nahīñ haiñ ye magas jaise log

sirf insān ke zaḳhmoñ pe nazar rakhte haiñ

koī yārān-e-sharī'at se ye jā kar pūchhe

pahle dil rakhte haiñ sajde meñ ki sar rakhte haiñ

hai koī ham meñ jo thaktā nahīñ chalte chalte

ghar meñ rah kar bhī ham ehsās-e-safar rakhte haiñ

āñdhiyāñ is ko gale aa ke lagā leñ shāyad

ik diyā aur sar-e-rāhguzar rakhte haiñ

bojh sar par liye phirnā nahīñ aatā ham ko

jo masā.il haiñ hamāre unheñ ghar rakhte haiñ

ek patjhaḌ sā lagā rahtā hai har dam dil meñ

ham jo siine meñ ye ehsās-e-shajar rakhte haiñ

niiñd jab ham ko satātī hai bahut maidāñ meñ

apnī khīñchī huī talvār pe sar rakhte haiñ

aa.e jo qatl ke darpe hai muqābil aa.e

ham bhī siine ko sadā apne sipar rakhte haiñ

bad-du’āoñ kā nahīñ hogā asar kuchh 'ābid'

ham buzurgoñ kī du'āoñ kā asar rakhte haiñ

tegh rakhte hain na hum tir-o-tabar rakhte hain

han yazidon se na jhuk pae wo sar rakhte hain

be-KHabar logon ko ehsas nahin hai is ka

jo KHabar wale hain har shai ki KHabar rakhte hain

phuTi kauDi ke nahin hain ye magas jaise log

sirf insan ke zaKHmon pe nazar rakhte hain

koi yaran-e-shari'at se ye ja kar puchhe

pahle dil rakhte hain sajde mein ki sar rakhte hain

hai koi hum mein jo thakta nahin chalte chalte

ghar mein rah kar bhi hum ehsas-e-safar rakhte hain

aandhiyan is ko gale aa ke laga len shayad

ek diya aur sar-e-rahguzar rakhte hain

bojh sar par liye phirna nahin aata hum ko

jo masail hain hamare unhen ghar rakhte hain

ek patjhaD sa laga rahta hai har dam dil mein

hum jo sine mein ye ehsas-e-shajar rakhte hain

nind jab hum ko satati hai bahut maidan mein

apni khinchi hui talwar pe sar rakhte hain

aae jo qatl ke darpe hai muqabil aae

hum bhi sine ko sada apne sipar rakhte hain

bad-du’aon ka nahin hoga asar kuchh 'abid'

hum buzurgon ki du'aon ka asar rakhte hain