tera kucha na chhuTega tere diwane se

terā kūcha na chhuTegā tire dīvāne se

is ko kā'be se na matlab hai na but-ḳhāne se

jo kahā maiñ ne karo kuchh mire rone kā ḳhayāl

hañs ke bole mujhe fursat hī nahīñ gaane se

ḳhair chup rahiye maza hī na milā bose kā

maiñ bhī be-lutf huā aap ke jhuñjhlāne se

maiñ jo kahtā huuñ ki martā huuñ to farmāte haiñ

kār-e-duniyā na rukegā tire mar jaane se

raunaq-e-‘ishq baḌhā detī hai betābī-e-dil

husn kī shaan fuzūñ hotī hai sharmāne se

dil-e-sad-chāk se khul jā.eñge hastī ke ye pech

bal nikal jā.eñge is zulf ke is shāne se

saf.ha-e-dahr pe haiñ naqsh-e-muḳhālif 'akbar'

ek ubhartā hai yahāñ ek ke miT jaane se

tera kucha na chhuTega tere diwane se

is ko ka'be se na matlab hai na but-KHane se

jo kaha main ne karo kuchh mere rone ka KHayal

hans ke bole mujhe fursat hi nahin gane se

KHair chup rahiye maza hi na mila bose ka

main bhi be-lutf hua aap ke jhunjhlane se

main jo kahta hun ki marta hun to farmate hain

kar-e-duniya na rukega tere mar jaane se

raunaq-e-‘ishq baDha deti hai betabi-e-dil

husn ki shan fuzun hoti hai sharmane se

dil-e-sad-chaak se khul jaenge hasti ke ye pech

bal nikal jaenge is zulf ke is shane se

safha-e-dahr pe hain naqsh-e-muKHalif 'akbar'

ek ubharta hai yahan ek ke miT jaane se