tere bin ye dil kisi ka ab to mushtaqi nahin

tere bin ye dil kisī kā ab to mushtāqī nahīñ

aisā lagtā hai tamanna ab koī baaqī nahīñ

āstīnoñ meñ chhupā.e phir rahe haiñ saañp sab

zahr ālūda fazā hai aaj tiryāqī nahīñ

aag kī hotī hai bārish āsmāñ se har ghaḌī

ab parinda koī bhī mahfūz āfāqī nahīñ

asl ye rūdād hai jis ko sunātā huuñ tumheñ

mustanad kirdār haiñ koī bhī ilhāqī nahīñ

aaj qazzāqoñ ke hai zer-e-asar har rāsta

kis taraf hotī batāo aaj qazzāqī nahīñ

maiñ sharīfoñ kī zabāñ meñ baat kartā huuñ miyāñ

kah diyā to merā lahja ġhair-aḳhlāqī nahīñ

kaise rindoñ kī bujhegī pyaas aise meñ 'qamar'

mai bhī hai miinā bhī sāġhar bhī hai bas saaqī nahīñ

tere bin ye dil kisi ka ab to mushtaqi nahin

aisa lagta hai tamanna ab koi baqi nahin

aastinon mein chhupae phir rahe hain sanp sab

zahr aaluda faza hai aaj tiryaqi nahin

aag ki hoti hai barish aasman se har ghaDi

ab parinda koi bhi mahfuz aafaqi nahin

asl ye rudad hai jis ko sunata hun tumhein

mustanad kirdar hain koi bhi ilhaqi nahin

aaj qazzaqon ke hai zer-e-asar har rasta

kis taraf hoti batao aaj qazzaqi nahin

main sharifon ki zaban mein baat karta hun miyan

kah diya to mera lahja ghair-aKHlaqi nahin

kaise rindon ki bujhegi pyas aise mein 'qamar'

mai bhi hai mina bhi saghar bhi hai bas saqi nahin