teri aawaz jab aati hai kahin se mujhko

terī āvāz jab aatī hai kahīñ se mujh ko

āsmāñ khīñchne lagtā hai zamīñ se mujh ko

DhūñDhtā rahtā huuñ aflāk meñ aksar lekin

rizq miltā hai hamesha hī zamīñ se mujh ko

ghar ko ik baar bhī ghar jaisā nahīñ lagne diyā

yahī shikva hai mire dil ke makīñ se mujh ko

is liye muḌ ke isī dasht meñ aa jaatā huuñ

koī āvāz lagātā hai yahīñ se mujh ko

tā-abad jiine pe majbūr kiyā jā.ūñgā

ḳhauf sā aatā hai firdaus-e-barīñ se mujh ko

jo maiñ apne liye chāhūñ vahī auroñ ke liye

dars miltā hai ye ajdād ke diiñ se mujh ko

is liye kaan havāoñ se lagā rakkhe haiñ

tū pukāregā kisī vaqt kahīñ se mujh ko

hajr-e-asvad se jo zaa.er ko huā kartī hai

vo 'aqīdat hai tirī ḳhanda-jabīñ se mujh ko

teri aawaz jab aati hai kahin se mujh ko

aasman khinchne lagta hai zamin se mujh ko

DhunDhta rahta hun aflak mein aksar lekin

rizq milta hai hamesha hi zamin se mujh ko

ghar ko ek bar bhi ghar jaisa nahin lagne diya

yahi shikwa hai mere dil ke makin se mujh ko

is liye muD ke isi dasht mein aa jata hun

koi aawaz lagata hai yahin se mujh ko

ta-abad jine pe majbur kiya jaunga

KHauf sa aata hai firdaus-e-barin se mujh ko

jo main apne liye chahun wahi auron ke liye

dars milta hai ye ajdad ke din se mujh ko

is liye kan hawaon se laga rakkhe hain

tu pukarega kisi waqt kahin se mujh ko

hajr-e-aswad se jo zaer ko hua karti hai

wo 'aqidat hai teri KHanda-jabin se mujh ko