تیری آواز جب آتی ہے کہیں سے مجھ کو

تیری آواز جب آتی ہے کہیں سے مجھ کو

آسماں کھینچنے لگتا ہے زمیں سے مجھ کو

ڈھونڈھتا رہتا ہوں افلاک میں اکثر لیکن

رزق ملتا ہے ہمیشہ ہی زمیں سے مجھ کو

گھر کو اک بار بھی گھر جیسا نہیں لگنے دیا

یہی شکوہ ہے مرے دل کے مکیں سے مجھ کو

اس لیے مڑ کے اسی دشت میں آ جاتا ہوں

کوئی آواز لگاتا ہے یہیں سے مجھ کو

تا ابد جینے پہ مجبور کیا جاؤں گا

خوف سا آتا ہے فردوس بریں سے مجھ کو

جو میں اپنے لیے چاہوں وہی اوروں کے لیے

درس ملتا ہے یہ اجداد کے دیں سے مجھ کو

اس لیے کان ہواؤں سے لگا رکھے ہیں

تو پکارے گا کسی وقت کہیں سے مجھ کو

حجر اسود سے جو زائر کو ہوا کرتی ہے

وہ عقیدت ہے تری خندہ جبیں سے مجھ کو