teri KHamoshi ko aankhon se lagae hue hain

terī ḳhāmoshī ko āñkhoñ se lagā.e hue haiñ

rū-barū ham tirī tasvīr ke aa.e hue haiñ

do alag vaqtoñ meñ ik saath dhaḌakte hue dil

ai zamīñ tere kināroñ ko milā.e hue haiñ

vo jo dekhe se bhī dekhe nahīñ jaate vahī ḳhvāb

mere dekhe hue haiñ tere dikhā.e hue haiñ

aañkh aise hai ki jaise abhī aatā hai koī

haath aise haiñ ki bas phuul uThā.e hue haiñ

naqsh dil par hai ki dīvār pe mā'lūm nahīñ

yuuñ banāne ko to tasvīr banā.e hue haiñ

bāġh-e-dil dekhne vaalā hai ki is baaġh ke ham

phuul haiñ aur bahāroñ ke rulā.e hue haiñ

tum ki ā.inda kī sūrat meñ the ojhal ojhal

ham tumheñ lamha-e-maujūd meñ laa.e hue haiñ

'ishq ye aur kisī kā thā jo karnā paḌā hai

ham kisī aur kā sāmān uThā.e hue haiñ

teri KHamoshi ko aankhon se lagae hue hain

ru-baru hum teri taswir ke aae hue hain

do alag waqton mein ek sath dhaDakte hue dil

ai zamin tere kinaron ko milae hue hain

wo jo dekhe se bhi dekhe nahin jate wahi KHwab

mere dekhe hue hain tere dikhae hue hain

aankh aise hai ki jaise abhi aata hai koi

hath aise hain ki bas phul uThae hue hain

naqsh dil par hai ki diwar pe ma'lum nahin

yun banane ko to taswir banae hue hain

bagh-e-dil dekhne wala hai ki is bagh ke hum

phul hain aur bahaaron ke rulae hue hain

tum ki aainda ki surat mein the ojhal ojhal

hum tumhein lamha-e-maujud mein lae hue hain

'ishq ye aur kisi ka tha jo karna paDa hai

hum kisi aur ka saman uThae hue hain