tha pas-e-mizhgan-tar ek hashr barpa aur bhi

thā pas-e-mizhgān-tar ik hashr barpā aur bhī

maiñ agar ye jāntā shāyad to rotā aur bhī

paañv kī zanjīr girdāb-e-balā hotī agar

Dūbte to sat.h par ik naqsh bantā aur bhī

āñdhiyoñ ne kar diye saare shajar be-barg-o-bār

varna jab patte khaḌakte dil laraztā aur bhī

rauzan-e-dar se havā kī siskiyāñ sunte raho

ye na dekho hai koī yaañ ābla-pā aur bhī

har taraf āvāz ke TuuTe hue girdāb haiñ

raushnī kam hai magar chaltā hai dariyā aur bhī

sirf tū hotā to terā vasl kuchh mushkil na thā

kyā kareñ tere sivā kuchh ham ne chāhā aur bhī

aarzū shab kī masāfat hai to tanhā kāTiye

din ke mahshar meñ to ho jā.eñge tanhā aur bhī

tha pas-e-mizhgan-tar ek hashr barpa aur bhi

main agar ye jaanta shayad to rota aur bhi

panw ki zanjir girdab-e-bala hoti agar

Dubte to sath par ek naqsh banta aur bhi

aandhiyon ne kar diye sare shajar be-barg-o-bar

warna jab patte khaDakte dil larazta aur bhi

rauzan-e-dar se hawa ki siskiyan sunte raho

ye na dekho hai koi yan aabla-pa aur bhi

har taraf aawaz ke TuTe hue girdab hain

raushni kam hai magar chalta hai dariya aur bhi

sirf tu hota to tera wasl kuchh mushkil na tha

kya karen tere siwa kuchh hum ne chaha aur bhi

aarzu shab ki masafat hai to tanha kaTiye

din ke mahshar mein to ho jaenge tanha aur bhi