Thik kahte hain sabhi ishq pareshani hai

Thiik kahte haiñ sabhī 'ishq pareshānī hai

haañ magar pahle mujhe kaun sī āsānī hai

ġhair-mumkin huī jaatī hai divāne kī shanāḳht

is qadar 'aam yahāñ chāk-garebānī hai

merī is baat kī tā.īd karegī duniyā

maiñ ne duniyā kī koī baat nahīñ maanī hai

vo añdherā hai maiñ ḳhud ko bhī nazar aatā nahīñ

tū mujhe dekh rahā hai mujhe hairānī hai

'ishq meñ hotā hai har kaam hī ulTā-sīdhā

āsmāñ maiñ ne bichhāyā hai zamīñ taanī hai

dhyān jaatā hai barābar usī manzar kī taraf

ye tasavvur usī tasvīr kā zindānī hai

raat bhar jāgtā rahtā huuñ maiñ 'ġhā.er' jaise

mere hī zimme sitāroñ kī nigahbānī hai

Thik kahte hain sabhi 'ishq pareshani hai

han magar pahle mujhe kaun si aasani hai

ghair-mumkin hui jati hai diwane ki shanaKHt

is qadar 'am yahan chaak-garebani hai

meri is baat ki taid karegi duniya

main ne duniya ki koi baat nahin mani hai

wo andhera hai main KHud ko bhi nazar aata nahin

tu mujhe dekh raha hai mujhe hairani hai

'ishq mein hota hai har kaam hi ulTa-sidha

aasman main ne bichhaya hai zamin tani hai

dhyan jata hai barabar usi manzar ki taraf

ye tasawwur usi taswir ka zindani hai

raat bhar jagta rahta hun main 'ghaer' jaise

mere hi zimme sitaron ki nigahbani hai