thoDi si ab dhum macha li ja sakti hai

thoḌī sī ab dhuum machā lī jā saktī hai

ġham baḌhne kī ḳhushī manā lī jā saktī hai

jaate jaate muḌ kar us ne dekh liyā hai

ab to us kī niiñd churā lī jā saktī hai

mujh ko us meñ us ko mujh meñ joḌ ke dekho

alag rahe to kamī nikālī jā saktī hai

nazroñ ke nazroñ se mil jaane ke baa'd

dil se dil kī baat nikālī jā saktī hai

ab to Dar sā lagtā hai kuchh bhī kahne meñ

bin bātoñ ke baat banā lī jā saktī hai

shahr ke hangāmoñ meñ dam ab ghuTne lagā hai

ḳhāmoshī se jaan bachā lī jā saktī hai

us ke husn kī bas itnī tā'rīf hai kaafī

us ke pīchhe 'umr nikālī jā saktī hai

haar ke jab aa hī baiThā huuñ maiḳhāne meñ

jaam meñ thoḌī thoḌī Daalī jā saktī hai

raat ke kuchh hissoñ meñ ab bhī sotā huuñ maiñ

dil kī hālat abhī sañbhālī jā saktī hai

thoDi si ab dhum macha li ja sakti hai

gham baDhne ki KHushi mana li ja sakti hai

jate jate muD kar us ne dekh liya hai

ab to us ki nind chura li ja sakti hai

mujh ko us mein us ko mujh mein joD ke dekho

alag rahe to kami nikali ja sakti hai

nazron ke nazron se mil jaane ke ba'd

dil se dil ki baat nikali ja sakti hai

ab to Dar sa lagta hai kuchh bhi kahne mein

bin baaton ke baat bana li ja sakti hai

shahr ke hangamon mein dam ab ghuTne laga hai

KHamoshi se jaan bacha li ja sakti hai

us ke husn ki bas itni ta'rif hai kafi

us ke pichhe 'umr nikali ja sakti hai

haar ke jab aa hi baiTha hun maiKHane mein

jam mein thoDi thoDi Dali ja sakti hai

raat ke kuchh hisson mein ab bhi sota hun main

dil ki haalat abhi sanbhaali ja sakti hai