Thokaren khaiye patthar bhi uThate chaliye

Thokareñ khā.iye patthar bhī uThāte chaliye

aane vāloñ ke liye raah banāte chaliye

apnā jo farz hai vo farz nibhāte chaliye

ġham ho jis kā bhī use apnā banāte chaliye

kal to aa.egā magar aaj na aa.egā kabhī

ḳhvāb-e-ġhaflat meñ jo haiñ un ko jagāte chaliye

azm hai dil meñ to manzil bhī koī duur nahīñ

sāmne aa.e jo dīvār girāte chaliye

nafrateñ fāsle kuchh aur baḌhā detī haiñ

giit kuchh pyaar ke in rāhoñ meñ gaate chaliye

rāh-e-dushvār hai be-sāya shajar haiñ saare

dhuup hai sar pe qadam tez baḌhāte chaliye

kaam ye ahl-e-jahāñ kā hai suneñ yā na suneñ

apnā paiġhām zamāne ko sunāte chaliye

dil meñ so.e hue naġhmoñ ko jagānā hai agar

merī āvāz meñ āvāz milāte chaliye

rāste jitne haiñ sab jaate haiñ manzil kī taraf

shart-e-manzil hai magar jhūmte gaate chaliye

kuchh mile yā na mile apnī vafāoñ kā sila

dāman-e-rasm-e-vafā apnā baḌhāte chaliye

yuuñ hī shāyad dil-e-vīrāñ meñ bahār aa jaa.e

zaḳhm jitne mileñ siine pe sajāte chaliye

jab talak haath na aa jaa.e kisī kā dāman

dhajjiyāñ apne girebāñ kī uḌāte chaliye

shauq se likhiye fasānā magar ik shart ke saath

is fasāne se mirā naam miTāte chaliye

aaj ke daur meñ 'naushād' yahī behtar hai

is bure daur se dāman ko bachāte chaliye

Thokaren khaiye patthar bhi uThate chaliye

aane walon ke liye rah banate chaliye

apna jo farz hai wo farz nibhate chaliye

gham ho jis ka bhi use apna banate chaliye

kal to aaega magar aaj na aaega kabhi

KHwab-e-ghaflat mein jo hain un ko jagate chaliye

azm hai dil mein to manzil bhi koi dur nahin

samne aae jo diwar giraate chaliye

nafraten fasle kuchh aur baDha deti hain

git kuchh pyar ke in rahon mein gate chaliye

rah-e-dushwar hai be-saya shajar hain sare

dhup hai sar pe qadam tez baDhate chaliye

kaam ye ahl-e-jahan ka hai sunen ya na sunen

apna paigham zamane ko sunate chaliye

dil mein soe hue naghmon ko jagana hai agar

meri aawaz mein aawaz milate chaliye

raste jitne hain sab jate hain manzil ki taraf

shart-e-manzil hai magar jhumte gate chaliye

kuchh mile ya na mile apni wafaon ka sila

daman-e-rasm-e-wafa apna baDhate chaliye

yun hi shayad dil-e-viran mein bahaar aa jae

zaKHm jitne milen sine pe sajate chaliye

jab talak hath na aa jae kisi ka daman

dhajjiyan apne gireban ki uDate chaliye

shauq se likhiye fasana magar ek shart ke sath

is fasane se mera nam miTate chaliye

aaj ke daur mein 'naushad' yahi behtar hai

is bure daur se daman ko bachate chaliye