tera karam hai guman se baid bismillah

tirā karam hai gumāñ se ba'īd bismillāh

tirī faqīr maiñ terī murīd bismillāh

tujhe pasand haiñ gar marhabā ye ranj-o-alam

mire ġhamoñ se ḳhushī kar kashīd bismillāh

mile to hoñge mohabbat bhare mire naame

koī javāb koī to rasīd bismillāh

kabhī to ghol samā'at meñ lahn misrī sā

kabhī ho mujh se bhī guft-o-shunīd bismillāh

utar sakūñ tire me'yār par tarāsh mujhe

hai izn kar mirī qat'-o-burīd bismillāh

koī to lamha-e-ḳhush-kun uchhāl merī taraf

'atā ho koī to sā'at sa’īd bismillāh

mohabbatoñ meñ kahāñ bhāv-tāv chaltā hai

maiñ kauḌiyoñ meñ bikūñ aa ḳharīd bismillāh

kisī ke vā'de ne sarsabz kar diyā mujh ko

hai jaagī dil meñ jo ummīd-e-dīd bismillāh

tire ḳhayāl se har shab shab-e-barāt mirī

tirī hī diid se har din hai 'iid bismillāh

du'ā meñ kaise kamī ho tire ḳhazāne meñ

koī kamī nahīñ hal-mim-mazīd bismillāh

har ek hamd-o-sanā us ke naam hai 'nasrīñ'

ki us kī zaat hai zāt-e-hamīd bismillāh

tera karam hai guman se ba'id bismillah

teri faqir main teri murid bismillah

tujhe pasand hain gar marhaba ye ranj-o-alam

mere ghamon se KHushi kar kashid bismillah

mile to honge mohabbat bhare mere name

koi jawab koi to rasid bismillah

kabhi to ghol sama'at mein lahn misri sa

kabhi ho mujh se bhi guft-o-shunid bismillah

utar sakun tere me'yar par tarash mujhe

hai izn kar meri qat'-o-burid bismillah

koi to lamha-e-KHush-kun uchhaal meri taraf

'ata ho koi to sa'at sa’id bismillah

mohabbaton mein kahan bhaw-taw chalta hai

main kauDiyon mein bikun aa KHarid bismillah

kisi ke wa'de ne sarsabz kar diya mujh ko

hai jagi dil mein jo ummid-e-did bismillah

tere KHayal se har shab shab-e-baraat meri

teri hi did se har din hai 'id bismillah

du'a mein kaise kami ho tere KHazane mein

koi kami nahin hal-mim-mazid bismillah

har ek hamd-o-sana us ke nam hai 'nasrin'

ki us ki zat hai zat-e-hamid bismillah