ترا کرم ہے گماں سے بعید بسم اللہ

ترا کرم ہے گماں سے بعید بسم اللہ

تری فقیر میں تیری مرید بسم اللہ

تجھے پسند ہیں گر مرحبا یہ رنج و الم

مرے غموں سے خوشی کر کشید بسم اللہ

ملے تو ہوں گے محبت بھرے مرے نامے

کوئی جواب کوئی تو رسید بسم اللہ

کبھی تو گھول سماعت میں لحن مصری سا

کبھی ہو مجھ سے بھی گفت و شنید بسم اللہ

اتر سکوں ترے معیار پر تراش مجھے

ہے اذن کر مری قطع و برید بسم اللہ

کوئی تو لمحۂ خوش کن اچھال میری طرف

عطا ہو کوئی تو ساعت سعید بسم اللہ

محبتوں میں کہاں بھاؤ تاؤ چلتا ہے

میں کوڑیوں میں بکوں آ خرید بسم اللہ

کسی کے وعدے نے سر سبز کر دیا مجھ کو

ہے جاگی دل میں جو امید دید بسم اللہ

ترے خیال سے ہر شب شب برات مری

تری ہی دید سے ہر دن ہے عید بسم اللہ

دعا میں کیسے کمی ہو ترے خزانے میں

کوئی کمی نہیں ہل من مزید بسم اللہ

ہر ایک حمد و ثنا اس کے نام ہے نسریںؔ

کہ اس کی ذات ہے ذات حمید بسم اللہ