tera KHayal faqat mera aaina kyon hai

tirā ḳhayāl faqat merā aa.ina kyoñ hai

tū hī batā mirī fitrat meñ ye vafā kyoñ hai

ḳhizāñ-nasīb bahāroñ kā silsila kyoñ hai

hamāre saath hī āḳhir ye hādisa kyoñ hai

amīr-e-shahr se har aadmī hai ham-āhang

ġharīb-e-shahr magar itnā be-navā kyoñ hai

har ek lamha dikhā.egā dard kī tasvīr

ga.e zamāne kī jānib tū dekhtā kyoñ hai

agarche jhuuT hī me'yār-e-sidq Thahrā hai

to phir ye sach ke ḳhudāoñ ko pūjtā kyoñ hai

ḳhud apne aap ko tū ne bikher rakkhā thā

ab apne aap ko āḳhir sameTā kyoñ hai

vo jin kā zikr bhī tauhīn-e-ādamiyyat thā

ab aise ḳhāk-nashīnoñ kā tazkira kyoñ hai

hameñ pata hai ki kyā ‘arz-e-mudda'ā hogā

hamāre sāmne tamhīd bāñdhtā kyoñ hai

agar nahīñ hai asar merī āh-o-zārī meñ

sukūt-e-shab mire nāloñ se TūTtā kyoñ hai

jab us se koī ta'alluq nahīñ 'azīm' to phir

hamārī samt mohabbat se dekhtā kyoñ hai

tera KHayal faqat mera aaina kyon hai

tu hi bata meri fitrat mein ye wafa kyon hai

KHizan-nasib bahaaron ka silsila kyon hai

hamare sath hi aaKHir ye hadisa kyon hai

amir-e-shahr se har aadmi hai ham-ahang

gharib-e-shahr magar itna be-nawa kyon hai

har ek lamha dikhaega dard ki taswir

gae zamane ki jaanib tu dekhta kyon hai

agarche jhuT hi me'yar-e-sidq Thahra hai

to phir ye sach ke KHudaon ko pujta kyon hai

KHud apne aap ko tu ne bikher rakkha tha

ab apne aap ko aaKHir sameTa kyon hai

wo jin ka zikr bhi tauhin-e-adamiyyat tha

ab aise KHak-nashinon ka tazkira kyon hai

hamein pata hai ki kya ‘arz-e-mudda'a hoga

hamare samne tamhid bandhta kyon hai

agar nahin hai asar meri aah-o-zari mein

sukut-e-shab mere nalon se TuTta kyon hai

jab us se koi ta'alluq nahin 'azim' to phir

hamari samt mohabbat se dekhta kyon hai