tere aanchal ko dhani likh raha hun

tire āñchal ko dhānī likh rahā huuñ

tujhe maiñ rāt-rānī likh rahā huuñ

ye dard-e-dil ye aañsū zaḳhm saare

kisī kī mehrbānī likh rahā huuñ

hai mere zehn meñ jis kā tasavvur

use pariyoñ kī raanī likh rahā huuñ

kisī ko lan-tarānī lag rahī haiñ

jo bāteñ ḳhush-bayānī likh rahā huuñ

tire lab mere lab ke mā-hasal haiñ

tire sadqe javānī likh rahā huuñ

havā ko bhī kabhī maiñ kaaT dūñgā

abhī paanī pe paanī likh rahā huuñ

jalāl-ud-ddīn-akbar se na kahnā

mohabbat kī kahānī likh rahā huuñ

jise kahtī hai duniyā naukrānī

use mahloñ kī raanī likh rahā huuñ

adab se baiThiye ḳhāmosh rahiye

buzurgoñ kī nishānī likh rahā huuñ

jise 'ishrāq' jo karnā hai kar le

maiñ is duniyā ko faanī likh rahā huuñ

tere aanchal ko dhani likh raha hun

tujhe main raat-rani likh raha hun

ye dard-e-dil ye aansu zaKHm sare

kisi ki mehrbani likh raha hun

hai mere zehn mein jis ka tasawwur

use pariyon ki rani likh raha hun

kisi ko lan-tarani lag rahi hain

jo baaten KHush-bayani likh raha hun

tere lab mere lab ke ma-hasal hain

tere sadqe jawani likh raha hun

hawa ko bhi kabhi main kaT dunga

abhi pani pe pani likh raha hun

jalal-ud-ddin-akbar se na kahna

mohabbat ki kahani likh raha hun

jise kahti hai duniya naukrani

use mahlon ki rani likh raha hun

adab se baiThiye KHamosh rahiye

buzurgon ki nishani likh raha hun

jise 'ishraq' jo karna hai kar le

main is duniya ko fani likh raha hun