ترے ہونٹوں میں کیا بجلی چھپی ہے

ترے ہونٹوں میں کیا بجلی چھپی ہے

بدن میں روشنی سی بھر گئی ہے

سبھی اپنے بدن میں چھپ رہے ہیں

گھروں میں کچھ عجب سی بے گھری ہے

اجازت ہو تو خود کو پیش کر دوں

تری راتوں میں سورج کی کمی ہے

ملے ہم یوں تو پہلی بار لیکن

لگا ایسا پرانی دوستی ہے

بدل جاتا ہے اب ہر روز چہرہ

مری تصویر کیسی ہو گئی ہے

مرے ہاتھوں میں ہے خوشبو کا پیکر

بدن میں آگ سی کیوں لگ رہی ہے

بہ نام زندگی جمشیدؔ اب تو

کوئی انجان سی شے رہ گئی ہے