tere KHayal mein had se guzar gaya koi

tire ḳhayāl meñ had se guzar gayā koī

ġham-e-hayāt ko hairān kar gayā koī

havā.eñ jin ke ishāroñ pe raqs kartī haiñ

charāġh vo mire raste pe dhar gayā koī

mujhe pata bhī nahīñ chal sakā magar mujh meñ

tamām rang mohabbat ke bhar gayā koī

maiñ she'r kahtā rahā jis kī yaad meñ ab tak

kal us ke jaisā ġhazal meñ utar gayā koī

laboñ tak aayā huā qahqaha na rok sakā

phir us kī guuñj sunī aur Dar gayā koī

maiñ ḳhvāb buntā rahā zindagī ke aur kahīñ

fareb-e-zīst se ghabrā ke mar gayā koī

maiñ sochtā huuñ ki us kā likhā dikhā.ūñ use

kahe sune se to yaksar mukar gayā koī

bas ik zarā sī tavajjoh kī baat thī 'anvar'

nazar nazar se milī aur sañvar gayā koī

tere KHayal mein had se guzar gaya koi

gham-e-hayat ko hairan kar gaya koi

hawaen jin ke ishaaron pe raqs karti hain

charagh wo mere raste pe dhar gaya koi

mujhe pata bhi nahin chal saka magar mujh mein

tamam rang mohabbat ke bhar gaya koi

main she'r kahta raha jis ki yaad mein ab tak

kal us ke jaisa ghazal mein utar gaya koi

labon tak aaya hua qahqaha na rok saka

phir us ki gunj suni aur Dar gaya koi

main KHwab bunta raha zindagi ke aur kahin

fareb-e-zist se ghabra ke mar gaya koi

main sochta hun ki us ka likha dikhaun use

kahe sune se to yaksar mukar gaya koi

bas ek zara si tawajjoh ki baat thi 'anwar'

nazar nazar se mili aur sanwar gaya koi