tere suKHan ke mah-o-KHur teri nazar ke charagh

tire suḳhan ke mah-o-ḳhur tirī nazar ke charāġh

unhīñ ke dam se haiñ raushan mire hunar ke charāġh

zamīñ se tā-ba-falak kahkashāñ sī bikhrī huī

haqīqatan haiñ farozāñ kisī safar ke charāġh

ba-har zamāna unheñ āñdhiyoñ se laḌnā hai

tumhāre ghar ke diye hoñ ki mere ghar ke charāġh

vahāñ pe bhī isī tahzīb kā ujālā hai

jale udhar kī muñDeroñ pe bhī idhar ke charāġh

ab un ke saath havā dekheñ kyā sulūk kare

jalā to aa.e haiñ ham fikr-e-mo'atabar ke charāġh

bachā.e rakkheñ zarā aap apne dāman ko

na deñ inheñ kahīñ lau merī chashm-e-tar ke charāġh

kabhī jo āḳhir-e-shab āñkheñ nam huiiñ apnī

du'ā ke hoñToñ pe raushan hue asar ke charāġh

varaq varaq haiñ munavvar jo she'r kī sūrat

ḳhudā kare na kabhī gul hoñ ye 'qamar' ke charāġh

tere suKHan ke mah-o-KHur teri nazar ke charagh

unhin ke dam se hain raushan mere hunar ke charagh

zamin se ta-ba-falak kahkashan si bikhri hui

haqiqatan hain farozan kisi safar ke charagh

ba-har zamana unhen aandhiyon se laDna hai

tumhaare ghar ke diye hon ki mere ghar ke charagh

wahan pe bhi isi tahzib ka ujala hai

jale udhar ki munDeron pe bhi idhar ke charagh

ab un ke sath hawa dekhen kya suluk kare

jala to aae hain hum fikr-e-mo'atabar ke charagh

bachae rakkhen zara aap apne daman ko

na den inhen kahin lau meri chashm-e-tar ke charagh

kabhi jo aaKHir-e-shab aankhen nam huin apni

du'a ke honTon pe raushan hue asar ke charagh

waraq waraq hain munawwar jo she'r ki surat

KHuda kare na kabhi gul hon ye 'qamar' ke charagh