tire va.ade kā har ik ko agar e'tibār hotā
to jahāñ meñ kuchh na hotā faqat intizār hotā
abhī kam hai soz-e-ulfat ki nafas sharar-fishāñ hai
agar aag tez hotī to ye sho.ala-bār hotā
dil-o-tīr-e-ḳhūñ-chakā kī vo shabīh khīñch detā
jo lahū kā koī qatra sar-e-nok-e-ḳhār hotā
mujhe dard bhī thā rāhat mujhe ġham bhī thā masarrat
jo vo mujh ko rañj de kar kabhī ġham-gusār hotā
jo bharā hai ġham se siina to sukūt hī hai behtar
ki laboñ par aah aatī to ik ishtihār hotā
kabhī yuuñ miTā na saktā use āsmān-e-zālim
tire dar pe o sitamgar jo mirā mazār hotā
ye hijāb-e-jism-e-ḳhākī ki hai diid kā munāfī
kabhī darmiyāñ se uThtā to visāl-e-yār hotā
na huā asar kisī par mire nāla-e-hazīñ kā
tirā tiir thā na zālim ki jigar ke paar hotā
abhī aur tuul dete ġham-e-ishq ko 'nazar' ham
agar apnī zindagī kā hameñ e'tibār hotā
tere wade ka har ek ko agar e'tibar hota
to jahan mein kuchh na hota faqat intizar hota
abhi kam hai soz-e-ulfat ki nafas sharar-fishan hai
agar aag tez hoti to ye shoala-bar hota
dil-o-tir-e-KHun-chaka ki wo shabih khinch deta
jo lahu ka koi qatra sar-e-nok-e-KHar hota
mujhe dard bhi tha rahat mujhe gham bhi tha masarrat
jo wo mujh ko ranj de kar kabhi gham-gusar hota
jo bhara hai gham se sina to sukut hi hai behtar
ki labon par aah aati to ek ishtihaar hota
kabhi yun miTa na sakta use aasman-e-zalim
tere dar pe o sitamgar jo mera mazar hota
ye hijab-e-jism-e-KHaki ki hai did ka munafi
kabhi darmiyan se uThta to visal-e-yar hota
na hua asar kisi par mere nala-e-hazin ka
tera tir tha na zalim ki jigar ke par hota
abhi aur tul dete gham-e-ishq ko 'nazar' hum
agar apni zindagi ka hamein e'tibar hota
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.