teri bewafai ke baad bhi mere dil ka pyar nahin gaya

tirī bevafā.ī ke baad bhī mire dil kā pyaar nahīñ gayā

shab-e-intizār guzar ga.ī ġham-e-intizār nahīñ gayā

maiñ samundaroñ kā nasīb thā mirā Dūbnā bhī ajiib thā

mire dil ne mujh se bahut kahā maiñ utar ke paar nahīñ gayā

tū mirā sharīk-e-safar nahīñ mire dil se duur magar nahīñ

tirī mamlikat na rahī magar tirā iḳhtiyār nahīñ gayā

use itnā sochā hai roz o shab ki savāl-e-dīd rahā na ab

vo galī bhī zer-e-tavāf hai jahāñ ek baar nahīñ gayā

kabhī koī vaada vafā na kar yūñhī roz roz bahāna kar

tū fareb de ke chalā gayā tirā e'tibār nahīñ gayā

mujhe us ke zarf kī kyā ḳhabar kahīñ aur jā ke hañse agar

mire hāl-e-dil pe to ro.e bin koī ġham-gusār nahīñ gayā

use kyā ḳhabar ki shikastagī hai junūñ kī manzil-e-āgahī

jo matā-e-shīsha-e-dil liye sar-e-kū-e-yār nahīñ gayā

mirī zindagī mirī shā.irī kisī ġham kī den hai 'jāfarī'

dil o jaañ kā qarz chukā diyā maiñ gunāhgār nahīñ gayā

teri bewafai ke baad bhi mere dil ka pyar nahin gaya

shab-e-intizar guzar gai gham-e-intizar nahin gaya

main samundaron ka nasib tha mera Dubna bhi ajib tha

mere dil ne mujh se bahut kaha main utar ke par nahin gaya

tu mera sharik-e-safar nahin mere dil se dur magar nahin

teri mamlikat na rahi magar tera iKHtiyar nahin gaya

use itna socha hai roz o shab ki sawal-e-did raha na ab

wo gali bhi zer-e-tawaf hai jahan ek bar nahin gaya

kabhi koi wada wafa na kar yunhi roz roz bahana kar

tu fareb de ke chala gaya tera e'tibar nahin gaya

mujhe us ke zarf ki kya KHabar kahin aur ja ke hanse agar

mere haal-e-dil pe to roe bin koi gham-gusar nahin gaya

use kya KHabar ki shikastagi hai junun ki manzil-e-agahi

jo mata-e-shisha-e-dil liye sar-e-ku-e-yar nahin gaya

meri zindagi meri shairi kisi gham ki den hai 'jafari'

dil o jaan ka qarz chuka diya main gunahgar nahin gaya