teri chashm-e-tarab ko dekhna paDta hai pur-nam bhi

tirī chashm-e-tarab ko dekhnā paḌtā hai pur-nam bhī

mohabbat ḳhanda-e-be-bāk bhī hai girya-e-ġham bhī

thakan tere badan kī uzr koī DhūñDh hī letī

hadīs-e-mahfil-e-shab kah rahī hai zulf barham bhī

ba-qadr-e-dil yahāñ se shola-e-jāñ-sāz miltā hai

charāġh-e-husn kī lau shoḳh bhī hai aur maddham bhī

mirī tanhā.iyoñ kī dil-kashī terī balā jaane

merī tanhā.iyoñ se pyaar kartā hai tirā ġham bhī

bahāroñ ke ġhazal-ḳhvāñ aaj ye mahsūs karte haiñ

pas-e-dīvār-e-gul rotī rahī hai chashm-e-shabnam bhī

qarīb aate magar kuchh fāsla bhī darmiyāñ rahtā

kamī ye rah ga.ī hai bāvajūd-e-rabt-e-bāham bhī

'zahīr' un ko hamāre dil kī har shoḳhī gavārā thī

unheñ karnā paḌegā ab hamāre dil kā mātam bhī

teri chashm-e-tarab ko dekhna paDta hai pur-nam bhi

mohabbat KHanda-e-be-bak bhi hai girya-e-gham bhi

thakan tere badan ki uzr koi DhunDh hi leti

hadis-e-mahfil-e-shab kah rahi hai zulf barham bhi

ba-qadr-e-dil yahan se shola-e-jaan-saz milta hai

charagh-e-husn ki lau shoKH bhi hai aur maddham bhi

meri tanhaiyon ki dil-kashi teri bala jaane

meri tanhaiyon se pyar karta hai tera gham bhi

bahaaron ke ghazal-KHwan aaj ye mahsus karte hain

pas-e-diwar-e-gul roti rahi hai chashm-e-shabnam bhi

qarib aate magar kuchh fasla bhi darmiyan rahta

kami ye rah gai hai bawajud-e-rabt-e-baham bhi

'zahir' un ko hamare dil ki har shoKHi gawara thi

unhen karna paDega ab hamare dil ka matam bhi