teri gali mein jo dhuni ramae baiThe hain

tirī galī meñ jo dhūnī ramā.e baiThe haiñ

ajal-rsīda haiñ marne ko aa.e baiThe haiñ

karo hamārī bhī ḳhātir nikal ke parde se

ki mehmāñ haiñ tumhāre bulā.e baiThe haiñ

hamārī baġhloñ meñ bū-e-murād aatī hai

tumhāre pahlū meñ ham jab se aa.e baiThe haiñ

diyā jo itr unhīñ āshiqoñ ko miTTī kā

kahā ki ham na maleñge nahā.e baiThe haiñ

uThā ke bazm se ḳhalvat meñ tum ko le jaate

ye sochte haiñ ki apne parā.e baiThe haiñ

vo shab ko bazm meñ hañs hañs ke pūchhte the hameñ

ye kaun haiñ ki jo aañsū bahā.e baiThe haiñ

azal se hai ye do-ālam meñ raushnī jis kī

usī charāġh se ham lau lagā.e baiThe haiñ

bahār o nik.hat-e-gul hotī haiñ nisār un par

chaman meñ rañg vo apnā jamā.e baiThe haiñ

yahāñ bhī chain se sone na pā.eñge afsos

mazār meñ bhī nakīrain aa.e baiThe haiñ

uThāoge hameñ ab kyā tum apnī mahfil se

ham ārzū-o-havas ke biThā.e baiThe haiñ

bahār meñ na.ī sūjhī hai un ko gustāḳhī

urūs-e-bāġh kā ghūñgat uThā.e baiThe haiñ

farefta tirī is tirchhī tirchhī chitvan ke

chhurī kalejoñ meñ apne lagā.e baiThe haiñ

hamāre dafn-o-kafan kī bas ab karo tadbīr

ḳhabar bhī hai tumheñ ham zahr khaa.e baiThe haiñ

ye kuchh na samjheñge saudā.iyoñ pe rahm karo

havās-o-hosh junūñ meñ uḌaa.e baiThe haiñ

farishte dekhiye karte haiñ ham se kyā pursish

mare paḌe the lahad meñ jilā.e baiThe haiñ

faqīr kyuuñ ye hue haiñ 'sharaf' se pūchho to

bhabhūt mal ke jo dhūnī ramā.e baiThe haiñ

teri gali mein jo dhuni ramae baiThe hain

ajal-rsida hain marne ko aae baiThe hain

karo hamari bhi KHatir nikal ke parde se

ki mehman hain tumhaare bulae baiThe hain

hamari baghlon mein bu-e-murad aati hai

tumhaare pahlu mein hum jab se aae baiThe hain

diya jo itr unhin aashiqon ko miTTi ka

kaha ki hum na malenge nahae baiThe hain

uTha ke bazm se KHalwat mein tum ko le jate

ye sochte hain ki apne parae baiThe hain

wo shab ko bazm mein hans hans ke puchhte the hamein

ye kaun hain ki jo aansu bahae baiThe hain

azal se hai ye do-alam mein raushni jis ki

usi charagh se hum lau lagae baiThe hain

bahaar o nikhat-e-gul hoti hain nisar un par

chaman mein rang wo apna jamae baiThe hain

yahan bhi chain se sone na paenge afsos

mazar mein bhi nakirain aae baiThe hain

uThaoge hamein ab kya tum apni mahfil se

hum aarzu-o-hawas ke biThae baiThe hain

bahaar mein nai sujhi hai un ko gustaKHi

urus-e-bagh ka ghungat uThae baiThe hain

farefta teri is tirchhi tirchhi chitwan ke

chhuri kalejon mein apne lagae baiThe hain

hamare dafn-o-kafan ki bas ab karo tadbir

KHabar bhi hai tumhein hum zahr khae baiThe hain

ye kuchh na samjhenge saudaiyon pe rahm karo

hawas-o-hosh junun mein uDae baiThe hain

farishte dekhiye karte hain hum se kya pursish

mare paDe the lahad mein jilae baiThe hain

faqir kyun ye hue hain 'sharaf' se puchho to

bhabhut mal ke jo dhuni ramae baiThe hain