teri lakh hum pe jafa rahi tere lakh hum pe sitam rahe

tirī laakh ham pe jafā rahī tire laakh ham pe sitam rahe

ye hamāre zarf kī baat hai ki amīn-e-'azmat-e-ġham rahe

na ye but-kade kī rahīn ho na ye sajda-rez-e-haram rahe

ye mire jabīñ kī hai aarzū tire pā-e-nāz pe ḳham rahe

ye mirī nigāh ne kyā kiyā tire ruḳh se parda haTā diyā

na sanam-kadoñ meñ sanam rahe na haram meñ ahl-e-haram rahe

na vo rang-e-ruḳh se jhalak sake na vo chashm-e-tar se chhalak sake

jo tire nigāh ne ġham diye mire zarf-e-zabt se kam rahe

ye tumhīñ batāo ki peshtar kabhī tum se koī gila kiyā

kabhī shikva-sanj-e-jafā hue kabhī shikva-sanj-e-sitam rahe

kahāñ din vo 'ahd-e-shabāb ke vo junūn sar se utar gayā

vo mizāj-e-'ishq badal gayā na vo dil rahā na vo ham rahe

mujhe jis ne luuT liyā 'ziyā' koī rāhzan to na thā magar

jo maiñ ye batā duuñ vo kaun thā to kahāñ kisī kā bharam rahe

teri lakh hum pe jafa rahi tere lakh hum pe sitam rahe

ye hamare zarf ki baat hai ki amin-e-'azmat-e-gham rahe

na ye but-kade ki rahin ho na ye sajda-rez-e-haram rahe

ye mere jabin ki hai aarzu tere pa-e-naz pe KHam rahe

ye meri nigah ne kya kiya tere ruKH se parda haTa diya

na sanam-kadon mein sanam rahe na haram mein ahl-e-haram rahe

na wo rang-e-ruKH se jhalak sake na wo chashm-e-tar se chhalak sake

jo tere nigah ne gham diye mere zarf-e-zabt se kam rahe

ye tumhin batao ki peshtar kabhi tum se koi gila kiya

kabhi shikwa-sanj-e-jafa hue kabhi shikwa-sanj-e-sitam rahe

kahan din wo 'ahd-e-shabab ke wo junun sar se utar gaya

wo mizaj-e-'ishq badal gaya na wo dil raha na wo hum rahe

mujhe jis ne luT liya 'ziya' koi rahzan to na tha magar

jo main ye bata dun wo kaun tha to kahan kisi ka bharam rahe