تری محفل سے جب اٹھ کر ترا دیوانہ آتا ہے

تری محفل سے جب اٹھ کر ترا دیوانہ آتا ہے

کبھی تعظیم کو کعبہ کبھی بت خانہ آتا ہے

کیا کرتے ہیں فرزانے بھی اٹھ کر احترام اس کا

تمہاری بزم میں جب بھی کوئی دیوانہ آتا ہے

ہوس والے تری محفل میں کب تک بیٹھ سکتے ہیں

وہ اٹھ جاتے ہیں سوئے شمع جب پروانہ آتا ہے

دکھا دیتا ہے طوفاں سب کو دریائے حقیقت کا

کبھی جب موج پر اپنی ترا دیوانہ آتا ہے

خدا کو بے خبر اپنی اسیری سے کہوں کیوں کر

قفس میں مجھ سے پہلے میرا آب و دانہ آتا ہے

ہمارے منہ سے کیا کیا بے تکلف پھول جھڑتے ہیں

زباں پر جب کبھی ذکر رخ جانانہ آتا ہے

اسے چھوڑے ہوئے مدت ہوئی ہے اے حرم والو

نہ جانے یاد اب تک کیوں مجھے بت خانہ آتا ہے

تری محفل میں سب اے شمع آتے ہیں تماشائی

عقیدت سے کوئی آتا ہے تو پروانہ آتا ہے

ہماری بادہ خواری بھی ہے ساحرؔ رشک کے قابل

نہ پہنچیں ہم اگر چل کر یہاں مے خانہ آتا ہے