teri nigah ka ye inqalab dekha hai

tirī nigāh kā ye inqalāb dekhā hai

dil-o-nazar meñ ajab iztirāb dekhā hai

kabhī to ishq meñ ye inqalāb dekhā hai

ki apne aap ko hī be-hijāb dekhā hai

zamīn-e-shahr-e-vafā kyoñ na ho falak kā javāb

har ek zarra yahāñ āftāb dekhā hai

jo be-misāl hai duniyā meñ ishq-e-parvāna

to husn-e-sham.a ko bhī lā-javāb dekhā hai

diyā hai jis ne ḳhud apne lahū kā nazrāna

rah-e-vafā meñ use kāmyāb dekhā hai

har ek daur meñ ahl-e-sitam zalīl hue

jise bhī dekhā to ḳhāna-ḳharāb dekhā hai

nigāh-e-nāz ke andāz jānte haiñ ham

hamīñ ne raqs meñ jām-e-sharāb dekhā hai

tasavvurāt meñ rakhte haiñ ik hasīñ chehra

kisī ne ham sā bhī ahl-e-kitāb dekhā hai

ye rahnumā nahīñ rahzan haiñ daur-e-hāzir ke

kahīñ bhī tum ne inheñ kāmyāb dekhā hai

teri nigah ka ye inqalab dekha hai

dil-o-nazar mein ajab iztirab dekha hai

kabhi to ishq mein ye inqalab dekha hai

ki apne aap ko hi be-hijab dekha hai

zamin-e-shahr-e-wafa kyon na ho falak ka jawab

har ek zarra yahan aaftab dekha hai

jo be-misal hai duniya mein ishq-e-parwana

to husn-e-shama ko bhi la-jawab dekha hai

diya hai jis ne KHud apne lahu ka nazrana

rah-e-wafa mein use kaamyab dekha hai

har ek daur mein ahl-e-sitam zalil hue

jise bhi dekha to KHana-KHarab dekha hai

nigah-e-naz ke andaz jaante hain hum

hamin ne raqs mein jam-e-sharab dekha hai

tasawwuraat mein rakhte hain ek hasin chehra

kisi ne hum sa bhi ahl-e-kitab dekha hai

ye rahnuma nahin rahzan hain daur-e-hazir ke

kahin bhi tum ne inhen kaamyab dekha hai