teri shabih ki pahchan tak nahin pahuncha

tirī shabīh kī pahchān tak nahīñ pahuñchā

mirā gumāñ mire 'irfān tak nahīñ pahuñchā

kisī ḳhayāl ne mumkin kī had nahīñ dekhī

koī nihāyat-e-imkān tak nahīñ pahuñchā

tujhe maiñ husn-e-ta’alluq kī daad kaise duuñ

tirā sulūk to ehsān tak nahīñ pahuñchā

abhī ye lams mukammal nahīñ huā mirī jaan

abhī ye ḳhuun ke daurān tak nahīñ pahuñchā

darīda-pairahanī kā sabab to ham ḳhud haiñ

'adū kā haath garebān tak nahīñ pahuñchā

abhī bahār meñ vāraftagī nahīñ 'āsim'

gul-e-nihāl gulistān tak nahīñ pahuñchā

teri shabih ki pahchan tak nahin pahuncha

mera guman mere 'irfan tak nahin pahuncha

kisi KHayal ne mumkin ki had nahin dekhi

koi nihayat-e-imkan tak nahin pahuncha

tujhe main husn-e-ta’alluq ki dad kaise dun

tera suluk to ehsan tak nahin pahuncha

abhi ye lams mukammal nahin hua meri jaan

abhi ye KHun ke dauran tak nahin pahuncha

darida-pairahani ka sabab to hum KHud hain

'adu ka hath gareban tak nahin pahuncha

abhi bahaar mein waraftagi nahin 'asim'

gul-e-nihaal gulistan tak nahin pahuncha