تری وفا کا ہوا تھا کبھی گماں مجھ کو

تری وفا کا ہوا تھا کبھی گماں مجھ کو

وہی خیال ہوا عیش جاوداں مجھ کو

شکایت ستم دشمناں میں کیا کرتا

کہ بھولتا ہی نہیں لطف دوستاں مجھ کو

ترے جمال کا ذکر جمیل میں کرتا

نہ مل سکا کوئی عالم میں رازداں مجھ کو

نہ سنگ میل نہ نقش قدم نہ رہبر ہے

تری تلاش نے گم کر دیا کہاں مجھ کو

تو خود ملے نہ ملے جستجو کی داد تو دے

نشاں مرا بھی مٹا دے نہ دے نشاں مجھ کو

زبان شمع سے ظاہر ہو سوز پروانہ

کچھ اس طرح سے جلا سوزش نہاں مجھ کو

تلاش یار میں کھویا رہا جو میں بیخودؔ

ہوا نہ بار غم دو جہاں گراں مجھ کو