tishnagi jism ki miTTi mein gaDi milti hai

tishnagī jism kī miTTī meñ gaḌī miltī hai

aisā lagtā hai ki pyāsoñ se laḌī miltī hai

āñkheñ tārīk nasīb un se ziyāda tārīk

ham agar haath bhī māñgeñ to chhaḌī miltī hai

is binā par maiñ samajhtā huuñ ki ye juḌvāñ haiñ

'ishq kī shakl aziyyat se baḌī miltī hai

ahl-e-ḳhāna mujhe ab vaqt nahīñ de paate

vaise har saal janam-din pe ghaḌī miltī hai

zindagī ḳhasta-o-pāmāl milī thī mujh ko

jaise raste pe koī chiiz paḌī miltī hai

saañs chaḌh jaatī hai āġhāz-e-safar meñ apnī

mere jaisoñ ko kahāñ rail khaḌī miltī hai

abr dekhūñ to baras paḌtī haiñ āñkheñ 'najmī'

thal kā baasī huuñ muqaddar se jhaḌī miltī hai

tishnagi jism ki miTTi mein gaDi milti hai

aisa lagta hai ki pyason se laDi milti hai

aankhen tarik nasib un se ziyaada tarik

hum agar hath bhi mangen to chhaDi milti hai

is bina par main samajhta hun ki ye juDwan hain

'ishq ki shakl aziyyat se baDi milti hai

ahl-e-KHana mujhe ab waqt nahin de pate

waise har sal janam-din pe ghaDi milti hai

zindagi KHasta-o-pamal mili thi mujh ko

jaise raste pe koi chiz paDi milti hai

sans chaDh jati hai aaghaz-e-safar mein apni

mere jaison ko kahan rail khaDi milti hai

abr dekhun to baras paDti hain aankhen 'najmi'

thal ka basi hun muqaddar se jhaDi milti hai