titliyon ne sabha bulai hai

titliyoñ ne sabhā bulā.ī hai

gul ke zaḳhmoñ kī rū-numā.ī hai

phir sabā ne vo vārdāt-e-chaman

shāḳh-dar-shāḳh jā sunā.ī hai

kis kī aamad hai vahshat-e-dil ne

bazm kis ke liye sajā.ī hai

jab bhī tū rū-barū mire aayā

zindagī khul ke muskurā.ī hai

ab ye vīrān ho nahīñ saktā

dil meñ ik dard-e-āshnā.ī hai

har kisī ko milī naved-e-sahar

mere hisse meñ shaam aa.ī hai

manzileñ duur hotī jaatī haiñ

jaane kaisī shikasta-pā.ī hai

maut kahtī hai jis ko ye duniyā

ziist kī qaid se rihā.ī hai

bas gale se lagā hameñ kuchh der

ham ko darpesh ab judā.ī hai

zarra zarra huā hama-tan-gosh

jab bhī tū ne ġhazal sunā.ī hai

titliyon ne sabha bulai hai

gul ke zaKHmon ki ru-numai hai

phir saba ne wo wardat-e-chaman

shaKH-dar-shaKH ja sunai hai

kis ki aamad hai wahshat-e-dil ne

bazm kis ke liye sajai hai

jab bhi tu ru-baru mere aaya

zindagi khul ke muskurai hai

ab ye viran ho nahin sakta

dil mein ek dard-e-ashnai hai

har kisi ko mili nawed-e-sahar

mere hisse mein sham aai hai

manzilen dur hoti jati hain

jaane kaisi shikasta-pai hai

maut kahti hai jis ko ye duniya

zist ki qaid se rihai hai

bas gale se laga hamein kuchh der

hum ko darpesh ab judai hai

zarra zarra hua hama-tan-gosh

jab bhi tu ne ghazal sunai hai