to kya wo lamha-e-tar umr bhar na aaega

to kyā vo lamha-e-tar 'umr bhar na aa.egā

dar-e-nigāh koī lauT kar na aa.egā

yūñhī ḳhamoshī se karte hue ham 'ishq us se

samajh rahe the ki ilzām sar na aa.egā

na siikh pā.eñge jiinā kabhī baġhair us ke

hameñ ye 'ilm-o-hunar 'umr bhar na aa.egā

use umiid se ab dekhtā nahīñ koī

ab us daraḳht meñ koī samar na aa.egā

ye log sirf tamāshā.ī rah ga.e haiñ inheñ

hamārī aañkh kā aañsū nazar na aa.egā

huā ik 'arsa hameñ dekhe ab dar-o-dīvār

hamārī raah meñ kyā koī ghar na aa.egā

mujhe ye ġham nahīñ dīvār uTh ga.ī lekin

ab āftāb mire baam par na aa.egā

maiñ ahl-e-ḳhāna-e-sayyād mujh se kyā yaarī

tum us parinde se kahnā idhar na aa.egā

to kya wo lamha-e-tar 'umr bhar na aaega

dar-e-nigah koi lauT kar na aaega

yunhi KHamoshi se karte hue hum 'ishq us se

samajh rahe the ki ilzam sar na aaega

na sikh paenge jina kabhi baghair us ke

hamein ye 'ilm-o-hunar 'umr bhar na aaega

use umid se ab dekhta nahin koi

ab us daraKHt mein koi samar na aaega

ye log sirf tamashai rah gae hain inhen

hamari aankh ka aansu nazar na aaega

hua ek 'arsa hamein dekhe ab dar-o-diwar

hamari rah mein kya koi ghar na aaega

mujhe ye gham nahin diwar uTh gai lekin

ab aaftab mere baam par na aaega

main ahl-e-KHana-e-sayyaad mujh se kya yari

tum us parinde se kahna idhar na aaega