toD le shayad mohr-e-KHamoshi dil ki girhen khole Tuk

toḌ le shāyad mohr-e-ḳhamoshī dil kī girheñ khole Tuk

baiThe haiñ chup aas lagā.e kaash vo ham se bole Tuk

baḌhne lage phir shaam ke saa.e jalne lage yādoñ ke diye

dard-e-mohabbat mujh se lipaT kar tū bhī taḌap le ro le Tuk

duniyā duniyā hirs-o-havā hai aañsū kā kuchh mol nahīñ

dariyā dariyā rone vaale dāman dil kā dho le Tuk

maiñ bhī samjhūñ merā bhī hai apnā koī duniyā meñ

jīvan kī sunsān Dagar meñ saath mire tū ho le Tuk

dekhūñ un kī zulf kā saaya kaash kabhū aisā bhī ho

shaam Dhale jab raat kī raanī apnā juuḌā khole Tuk

zahr bharī duniyā se yaaro chalnā hai to us paas chalo

shāyad hoñToñ kī ik jumbish ras kānoñ meñ ghole Tuk

jiine ko bas ek tabassum ek nazar bhī kaafī hai

aur kahīñ do bol mohabbat ke vo ham se bole Tuk

jām-o-subū kī aag meñ kitne phuul khile haiñ yādoñ ke

pyaar kī is albelī rut meñ bain ke taar sañjo le Tuk

raat ke mub.ham sannāTe meñ yādoñ kī parchhā.īñ meñ

ro de hai rut shabnam shabnam pyāse nain bhigo le Tuk

ġham kī aañch se jab dil pighlā jaam banā maiḳhāne kā

baa'd ko jaam uThānā pahle ruuh meñ dard samo le Tuk

kaise kaise jaib-o-garebāñ chaak hue haiñ saarī raat

sub.h-e-bahārāñ ne tab jā kar ghūñghaT ke paT khole Tuk

she'r-o-suḳhan ke shah-pāroñ meñ rang abhī kuchh bharnā hai

ai fankār tū apnī palkeñ ḳhūn-e-dil meñ Dubo le Tuk

kitnī rāteñ āñkhoñ hī āñkhoñ meñ kaaTī haiñ 'jāved'

shāyad vo sapne meñ aaveñ muuñd le āñkheñ so le Tuk

toD le shayad mohr-e-KHamoshi dil ki girhen khole Tuk

baiThe hain chup aas lagae kash wo hum se bole Tuk

baDhne lage phir sham ke sae jalne lage yaadon ke diye

dard-e-mohabbat mujh se lipaT kar tu bhi taDap le ro le Tuk

duniya duniya hirs-o-hawa hai aansu ka kuchh mol nahin

dariya dariya rone wale daman dil ka dho le Tuk

main bhi samjhun mera bhi hai apna koi duniya mein

jiwan ki sunsan Dagar mein sath mere tu ho le Tuk

dekhun un ki zulf ka saya kash kabhu aisa bhi ho

sham Dhale jab raat ki rani apna juDa khole Tuk

zahr bhari duniya se yaro chalna hai to us pas chalo

shayad honTon ki ek jumbish ras kanon mein ghole Tuk

jine ko bas ek tabassum ek nazar bhi kafi hai

aur kahin do bol mohabbat ke wo hum se bole Tuk

jam-o-subu ki aag mein kitne phul khile hain yaadon ke

pyar ki is albeli rut mein bain ke tar sanjo le Tuk

raat ke mubham sannaTe mein yaadon ki parchhain mein

ro de hai rut shabnam shabnam pyase nain bhigo le Tuk

gham ki aanch se jab dil pighla jam bana maiKHane ka

ba'd ko jam uThana pahle ruh mein dard samo le Tuk

kaise kaise jaib-o-gareban chaak hue hain sari raat

subh-e-bahaaran ne tab ja kar ghunghaT ke paT khole Tuk

she'r-o-suKHan ke shah-paron mein rang abhi kuchh bharna hai

ai fankar tu apni palken KHun-e-dil mein Dubo le Tuk

kitni raaten aankhon hi aankhon mein kaTi hain 'jawed'

shayad wo sapne mein aawen mund le aankhen so le Tuk