توڑی گئی نہ ایک روایت نہ مل سکے

توڑی گئی نہ ایک روایت نہ مل سکے

ہم بھی خلاف رسم محبت نہ مل سکے

اللہ کرے بیان نہ کر پاؤ درد دل

اللہ کرے تمہیں یہ سہولت نہ مل سکے

تیماردار آئے بوقت وداع جاں

بیمار کو پہ سانس کی مہلت نہ مل سکے

مقبول ہو نہ پائے دعا اس کی ایک بھی

اک ہجر زاد کو شب وصلت نہ مل سکے

رخت سفر کو باندھ کے آمادہ ہو کوئی

لیکن روانگی کی اجازت نہ مل سکے

ہم سے ضرورتوں کی نہ تخصیص ہو سکی

ہم تو کسی سے حسب ضرورت نہ مل سکے

وہ شخص بھی ملا نہ ہمیں اس طرح حیاؔ

جیسے کسی کو کام کی اجرت نہ مل سکے