tohfa ye mohabbat ki nazar chhoD gai hai

tohfa ye mohabbat kī nazar chhoḌ ga.ī hai

kuchh kuchh ḳhalish-e-dard-e-jigar chhoḌ ga.ī hai

paimāne meñ saaqī kī nazar mai kī jagah par

piine ke liye ḳhūn-e-jigar chhoḌ ga.ī hai

jis raah se ḳhud gardish-e-daurāñ bhī na guzrī

vo mere liye rāhguzar chhoḌ ga.ī hai

tanzīm-e-charāġhāñ ke liye DhūñDh ke mujh ko

ghanghor añdheroñ meñ sahar chhoḌ ga.ī hai

murjhā na sakā jo kabhī garmī-e-ḳhizāñ se

us phuul ko gulchīñ kī nazar chhoḌ ga.ī hai

kyā soch ke mashshāta-e-zau rū-e-ufuq par

uljhe hue gesū-e-sahar chhoḌ ga.ī hai

ai maslahat-e-vaqt ye kyoñ ātish-e-hālāt

bastī meñ akelā mirā ghar chhoḌ ga.ī hai

maiñ qatl huā huuñ to mire ḳhuun kī har buuñd

tārīḳh ke dāman par asar chhoḌ ga.ī hai

paḌte hī 'kamāl' us kī nazar mujh pe ba-sad-nāz

ilzām-e-mohabbat mire sar chhoḌ ga.ī hai

tohfa ye mohabbat ki nazar chhoD gai hai

kuchh kuchh KHalish-e-dard-e-jigar chhoD gai hai

paimane mein saqi ki nazar mai ki jagah par

pine ke liye KHun-e-jigar chhoD gai hai

jis rah se KHud gardish-e-dauran bhi na guzri

wo mere liye rahguzar chhoD gai hai

tanzim-e-charaghan ke liye DhunDh ke mujh ko

ghanghor andheron mein sahar chhoD gai hai

murjha na saka jo kabhi garmi-e-KHizan se

us phul ko gulchin ki nazar chhoD gai hai

kya soch ke mashshata-e-zau ru-e-ufuq par

uljhe hue gesu-e-sahar chhoD gai hai

ai maslahat-e-waqt ye kyon aatish-e-haalat

basti mein akela mera ghar chhoD gai hai

main qatl hua hun to mere KHun ki har bund

tariKH ke daman par asar chhoD gai hai

paDte hi 'kamal' us ki nazar mujh pe ba-sad-naz

ilzam-e-mohabbat mere sar chhoD gai hai