tujhko kya malum kin unchaiyon mein kho gaya

tujh ko kyā mā'lūm kin ūñchā.iyoñ meñ kho gayā

jab tirī yādoñ kī maiñ gahrā.iyoñ meñ kho gayā

jannatoñ se ho gayā mahrūm to hairat hai kyoñ

tū bhī to duniyā kī in rā'nā.iyoñ meñ kho gayā

dil meñ tere bin yahāñ kohrām o mātam barpā hai

aur tū hai ki vahāñ shahnā.iyoñ meñ kho gayā

haañ vahī mā'sūm jo thā amn kā paiġhāmbar

jaane kyoñ ab mā'rka-ārā.iyoñ meñ kho gayā

mujh se kyā matlab ki vo qahhār hai jabbār hai

maiñ to bas us kī karam-farmā.iyoñ meñ kho gayā

kis qadar ġham se bharī us kī kahānī hai ki jo

dushmanoñ meñ thā numāyāñ bhā.iyoñ meñ kho gayā

har ghaḌī rahtā thā jis ke saath ik jamm-e-ġhafīr

aaj vo bhī qabr kī tanhā.iyoñ meñ kho gayā

laa.e the jis ko banā kar ham sharīk-e-anjuman

vo bhī apne 'āshiqoñ shaidā.iyoñ meñ kho gayā

tujh ko kya ma'lum kin unchaiyon mein kho gaya

jab teri yaadon ki main gahraiyon mein kho gaya

jannaton se ho gaya mahrum to hairat hai kyon

tu bhi to duniya ki in ra'naiyon mein kho gaya

dil mein tere bin yahan kohram o matam barpa hai

aur tu hai ki wahan shahnaiyon mein kho gaya

han wahi ma'sum jo tha amn ka paighambar

jaane kyon ab ma'rka-araiyon mein kho gaya

mujh se kya matlab ki wo qahhaar hai jabbar hai

main to bas us ki karam-farmaiyon mein kho gaya

kis qadar gham se bhari us ki kahani hai ki jo

dushmanon mein tha numayan bhaiyon mein kho gaya

har ghaDi rahta tha jis ke sath ek jamm-e-ghafir

aaj wo bhi qabr ki tanhaiyon mein kho gaya

lae the jis ko bana kar hum sharik-e-anjuman

wo bhi apne 'ashiqon shaidaiyon mein kho gaya